پاکستان آج (بدھ) سے چیمپئنز ٹرافی 2025 کی میزبانی کے لیے تیار ہے، جہاں نیشنل اسٹیڈیم کراچی میں افتتاحی میچ میں قومی ٹیم نیوزی لینڈ کے خلاف میدان میں اترے گی۔ یہ ایونٹ 1996 کے بعد پاکستان میں منعقد ہونے والا پہلا بڑا آئی سی سی ٹورنامنٹ ہے، جس کے پیش نظر ٹریفک پولیس نے شہریوں اور شائقین کی سہولت کے لیے تفصیلی ٹریفک پلان جاری کر دیا ہے۔
چیمپئنز ٹرافی 2025 ٹریفک پلان کی تفصیلات
کراچی میں ٹریفک کے بہاؤ کو برقرار رکھنے کے لیے درج ذیل اقدامات کیے گئے ہیں:
- سر شاہ سلیمان روڈ کی دونوں لینز ٹریفک کے لیے کھلی رہیں گی۔
- نیشنل کوچنگ سینٹر اور چائنا گراؤنڈ کو پارکنگ کے لیے مختص کیا گیا ہے۔
- بھاری ٹریفک کو سہراب گوٹھ سے نیپا، لیاقت آباد نمبر 10 سے حسن اسکوائر، پی پی چورنگی سے یونیورسٹی روڈ اور کارساز سے اسٹیڈیم ملیریئم ایریا تک محدود کر دیا گیا ہے۔
- نیو ٹاؤن اسٹیڈیم سگنل سے حسن اسکوائر تک بھاری ٹریفک کا داخلہ ممنوع ہوگا۔
- شہریوں کو ہدایت کی گئی ہے کہ وہ اپنی گاڑیاں یا موٹرسائیکلیں سروس روڈ یا مرکزی شاہراہوں پر کھڑی نہ کریں۔
چیمپئنز ٹرافی 2025: سیکیورٹی کے سخت انتظامات
ٹورنامنٹ کے دوران سیکیورٹی یقینی بنانے کے لیے 5,000 سے زائد سیکیورٹی اہلکار تعینات کیے گئے ہیں۔
پاکستان میں چیمپئنز ٹرافی کے مقامات
کراچی، لاہور اور راولپنڈی چیمپئنز ٹرافی 2025 کے میچز کی میزبانی کریں گے۔ پاکستان میں ہونے والے گروپ اسٹیج کے ہر مقام پر تین، تین میچز کھیلے جائیں گے۔
- دوسرا سیمی فائنل لاہور میں ہوگا۔
- فائنل 9 مارچ کو لاہور میں کھیلا جائے گا، تاہم اگر بھارت فائنل میں پہنچا تو یہ میچ دبئی میں ہوگا۔
- دونوں سیمی فائنلز اور فائنل کے لیے ریزرو ڈے رکھا گیا ہے۔
- بھارت کے تین گروپ میچز اور پہلا سیمی فائنل دبئی میں ہوگا۔
کراچی میں کرکٹ کے جوش و خروش کو مدنظر رکھتے ہوئے انتظامیہ نے شائقین کی سہولت کے لیے بہترین اقدامات کیے ہیں تاکہ چیمپئنز ٹرافی 2025 کو کامیاب بنایا جا سکے۔
