60 کلومیٹر فی گھنٹہ کی حد مقرر
لاہور: پنجاب حکومت نے سڑکوں پر حفاظت کو یقینی بنانے کے لیے صوبے بھر میں موٹرسائیکلوں کی رفتار 60 کلومیٹر فی گھنٹہ مقرر کر دی ہے۔ یہ فیصلہ 14 جنوری 2025 کو ہونے والے 22ویں صوبائی کابینہ اجلاس میں کیا گیا تھا اور اسے پروونشل موٹر وہیکلز آرڈیننس 1960 کے سیکشن 75(2) کے تحت نافذ کیا جا رہا ہے۔
سخت عملدرآمد کی ہدایات جاری
محکمہ ٹرانسپورٹ اور ماس ٹرانزٹ نے ایک باقاعدہ نوٹیفکیشن جاری کیا ہے، جس پر سیکرٹری عمران سکندر بلوچ کے دستخط موجود ہیں۔ اس میں متعلقہ حکام، بشمول ایڈیشنل انسپکٹر جنرل پولیس (ٹریفک) اور ضلعی ٹریفک افسران کو ہدایت دی گئی ہے کہ وہ اس قانون پر سختی سے عمل درآمد یقینی بنائیں۔
حادثات کا ڈیٹا چیف منسٹر آفس کو بھیجا جائے گا
پنجاب ایمرجنسی سروسز ڈیپارٹمنٹ کو ہدایت کی گئی ہے کہ وہ ہر پندرہ دن بعد موٹرسائیکل حادثات کا ڈیٹا فراہم کرے، تاکہ اس کا وزیر اعلیٰ آفس میں جائزہ لیا جا سکے۔
عوامی آگاہی مہم کا آغاز
حکومت نے عوام میں نئی رفتار کی حد کے بارے میں آگاہی پھیلانے اور سڑکوں پر حادثات کو کم کرنے کے لیے تشہیری مہم چلانے کی بھی ہدایت دی ہے۔
