پنجاب حکومت نے حال ہی میں "اپنی چھت، اپنا گھر” نامی منصوبہ کا آغاز کیا ہے جس کا مقصد عوام کو آسان شرائط پر گھر بنانے کے لیے قرضے فراہم کرنا ہے۔ اس سکیم کے تحت شہری علاقوں میں ایک سے پانچ مرلے اور دیہی علاقوں میں ایک سے دس مرلے تک زمین رکھنے والے افراد کو 15 لاکھ روپے تک کا بلاسود قرضہ فراہم کیا جائے گا۔
قرضہ حاصل کرنے کے بعد اقساط کی ادائیگی سات سال میں مکمل کی جائے گی، جس کے لیے ماہانہ 14 ہزار روپے کی قسط مقرر کی گئی ہے۔ قرضہ لینے والوں کو پہلے تین ماہ کی اقساط میں چھوٹ دی جائے گی۔ اس سکیم کے تحت پنجاب کے چھ بڑے اضلاع کو ترجیح دی جائے گی اور درخواست دینے کا عمل آن لائن بھی دستیاب ہوگا۔
اس کے علاوہ، اس سکیم میں خصوصی افراد کے لیے "ہمت کارڈ” کے ذریعے مالی امداد کی رقم 7,500 روپے سے بڑھا کر 10,000 روپے کر دی گئی ہے۔ یہ امداد تین ماہ کے وقفے سے بینک آف پنجاب کے ذریعے فراہم کی جائے گی۔
پنجاب کی وزیر اعلیٰ مریم نواز نے اس منصوبے کا افتتاح کرتے ہوئے کہا کہ حکومت عوام کو مہنگائی سے نجات دلانے اور ترقی کے عمل کو فروغ دینے کے لیے پُرعزم ہے۔ اس کے علاوہ، انہوں نے ایک بڑے سولر انرجی پروجیکٹ کا بھی اعلان کیا جس کا مقصد بجلی کے بلوں میں 45 سے 50 ارب روپے کی کمی لانا ہے۔
