پارکس اینڈ ہارٹیکلچر اتھارٹی (پی ایچ اے) نے لاہور میں موسم سرما کے لیے مختلف اقسام کے سجاوٹی پھولوں کی شجرکاری کا آغاز کر دیا ہے۔
پی ایچ اے کے ڈائریکٹر جنرل محمد طاہر وٹو کے مطابق، اس منصوبے کے تحت گلِ داؤدی اور فرنچ میرگولڈ کی پنیریاں گرین بیلٹس پر لگائی جا رہی ہیں، جن میں گلبرگ مین بلیوارڈ، کینال روڈ، جیل روڈ، علی زیب روڈ، اور سبزہ زار مین بلیوارڈ شامل ہیں۔
انہوں نے بتایا کہ مرگولڈ (گینڈی) کے پھول اپنے شوخ رنگ، کم نگہداشت کی ضرورت اور خوبصورت ظاہری شکل کی وجہ سے پسند کیے جاتے ہیں اور یہ دنیا بھر کے باغات میں کاشت کیے جاتے ہیں۔
اس کے علاوہ، پی ایچ اے نے مری نرسری میں انڈین ڈاہلیا کی پنیریاں بھی تیار کی ہیں، جنہیں 12 اور 14 انچ کے گملوں میں منتقل کیا جائے گا، اور مکمل نشوونما کے بعد انہیں پی ایچ اے کی سالانہ پھولوں کی نمائش میں پیش کیا جائے گا۔
محمد طاہر وٹو کا مزید کہنا تھا کہ پی ایچ اے کا مقصد لاہور کو حقیقی معنوں میں باغات اور پھولوں کا شہر بنانا ہے، اور اس شجرکاری سے شہر کی خوبصورتی میں مزید اضافہ ہوگا۔
