غزہ پٹی میں امداد کے منتظر فلسطینیوں پر اسرائیلی فوج کے حملے میں مزید 8 فلسطینی، جن میں سول گارڈز بھی شامل ہیں، شہید جبکہ کئی زخمی ہوگئے ہیں۔
عرب میڈیا کی رپورٹ کے مطابق غزہ میں انسانی امداد پہنچانے کے لیے استعمال ہونے والے راستے پر یہ حملہ اسرائیلی فوج کے اس اعلان کے بعد کیا گیا کہ غزہ پٹی میں انسانی بنیادوں پر امدادی کارروائیاں جاری رکھنے کے لیے امدادی سامان کی ترسیل والے روٹ پر روزانہ 11 گھنٹے آپریشن نہ کرنے کا فیصلہ کیا گیا ہے۔
قابض اسرائیلی فوج نے غزہ کے لوگوں کو عید بھی منانے نہیں دی، غزہ میں مسلسل بمباری جاری ہے، اور بچوں سمیت متعدد فلسطینی شہید ہوچکے ہیں۔ غزہ میں فلسطینیوں کی نسل کشی پر امریکی خبر ایجنسی کی رپورٹ کے مطابق اسرائیلی فوج نے حملوں میں غزہ کے کچھ خاندانوں کی چار نسلوں کو ختم کر دیا ہے۔
دوسری جانب رفح میں القسام بریگیڈ کے جوابی حملے کے دوران دو روز میں 11 اسرائیلی فوجی ہلاک ہوئے ہیں جبکہ لبنان سے حزب اللہ اور اسرائیلی فوج کی جھڑپوں میں بھی اضافہ ہوگیا ہے۔ اسرائیلی فوج نے حزب اللہ سے تنازعہ وسیع ہونے کا عندیہ دے دیا ہے۔
ادھر اسرائیلی حکومت نے فلسطین کو تسلیم کرنے والے ممالک پر پابندیاں لگانے پر غور شروع کردیا ہے۔
غزہ جنگ جاری رکھنے پر اسرائیلی جنگی کابینہ میں اختلافات اور دو وزراء کے مستعفی ہونے کے بعد اسرائیلی وزیراعظم نے جنگی کابینہ تحلیل کر دی ہے۔
