پاکستانی گلوکار عاصم اظہر نے حال ہی میں عندیہ دیا ہے کہ وہ جلد ہی اپنا نیا گانا ریلیز کر سکتے ہیں یہ اعلان انہوں نے اداکارہ میرب علی سے علیحدگی کے چند دن بعد کیا۔
دونوں نے 12 جون 2025 کو اپنی منگنی کے تین سال بعد علیحدگی کا اعلان کیا جس نے مداحوں کو حیران کر دیا۔ عاصم اظہر نے یہ خبر اپنے انسٹاگرام اسٹوری کے ذریعے شیئر کی۔ اپنے پیغام میں انہوں نے لکھا:
"کافی سوچ بچار اور غور و فکر کے بعد میں اور میرب نے باہمی رضامندی سے الگ راستوں پر آگے بڑھنے کا فیصلہ کیا ہے۔”
میرب علی کی جانب سے باضابطہ طور پر کوئی بیان جاری نہیں کیا گیا تاہم انہوں نے اپنے حالیہ ماڈلنگ شوٹ کی کچھ پردے کے پیچھے کی تصاویر انسٹاگرام پر شیئر کیں۔ ایک ویڈیو میں وہ BLACKPINK کی روز اور برونو مارس کے گانے ‘APT’ پر جھومتی نظر آئیں۔ مداحوں نے اسے ان کا "بریک اپ کے بعد کا گلو اپ” قرار دیا۔
علیحدگی کے تھوڑے ہی عرصے بعد عاصم اظہر نے اشارہ دیا کہ انہوں نے کچھ نیا لکھا ہے۔ انہوں نے اپنے میوزک اسٹوڈیو سے ایک تصویر انسٹاگرام پر پوسٹ کی اور لکھا:
"ابھی کچھ لکھا ہے شاید جلد ریلیز کر دوں۔”
اس اعلان کے بعد ان کے مداح پرجوش ہو گئے ہیں اور اب بے صبری سے اس نئے گانے کا انتظار کر رہے ہیں۔
عاصم اظہر اور میرب علی بچپن کے دوست ہیں۔ دونوں نے مشہور ڈرامہ ‘صنفِ آہن‘ میں ایک ساتھ کام کیا تھا۔ کئی عوامی تقاریب میں ایک ساتھ نظر آنے کے بعد 2022 میں ایک نجی تقریب میں منگنی کی۔ تاہم اب دونوں نے اپنی زندگی کے الگ راستے اختیار کرنے کا پرامن فیصلہ کیا ہے۔
