پاکستان کرکٹ بورڈ (پی سی بی) نے اعلان کیا ہے کہ سابق فاسٹ باؤلر اظہر محمود کو نیوزی لینڈ کے خلاف آئندہ پانچ میچوں کی ٹی ٹوئنٹی سیریز کے لیے پاکستان مینز کرکٹ ٹیم کا ہیڈ کوچ نامزد کر دیا گیا ہے۔
تفصیلات کے مطابق پانچ میچوں کی ٹی ٹوئنٹی سیریز کا آغاز 18 اپریل کو راولپنڈی کرکٹ اسٹیڈیم میں ہوگا اور 27 اپریل کو قذافی اسٹیڈیم لاہور میں اختتام پذیر ہوگا۔
پی سی بی نے ایک سرکاری بیان میں کہا ہے کہ اظہر محمود نے 164 بین الاقوامی میچوں میں پاکستان کی نمائندگی کی ہے جس میں 162 وکٹیں حاصل کیں اور 2421 رنز بنائے۔
اظہر محمود کی پاکستان مینز کرکٹ ٹیم کے ساتھ پچھلی اسائنمنٹ 2016-2019 تک تھی جب وہ بولنگ کوچ تھے۔
دریں اثناء وہاب ریاض کو سینئر ٹیم منیجر جبکہ محمد یوسف کو بیٹنگ کوچ مقرر کیا گیا ہے۔
سعید اجمل جو آسٹریلیا اور نیوزی لینڈ کے گزشتہ دوروں میں باؤلنگ کوچ تھے وہ اسپن باؤلنگ کوچ کے طور پر برقرار رہیں گے۔
دریں اثنا، پاکستان کی مردوں کی کرکٹ ٹیم اس وقت کاکول میں پاکستان آرمی کے ٹرینرز کے زیر اہتمام فٹنس کیمپ میں حصہ لے رہی ہے۔
کپتان بابر اعظم اور پاکستان کے چیف سلیکٹرز ان کھلاڑیوں کی فہرست کو حتمی شکل دینے کے لیے مشاورت کر رہے ہیں جو پانچ میچوں کی ٹی20 سیریز میں حصہ لیں گے۔
دوسری جانب نیوزی لینڈ سیریز کے لیے پاکستان کرکٹ ٹیم کا اعلان منگل کو کیا جائے گا۔
گزشتہ ماہ آئی سی سی مینز ٹی ٹوئنٹی ورلڈ کپ 2024 سے چند ماہ قبل اسٹار بلے باز بابر اعظم کو دوبارہ وائٹ بال کا کپتان مقرر کیا گیا ہے۔
نیوزی لینڈ ٹی ٹوئنٹی کے لیے پاکستانی ٹیم کے سپورٹ ممبرز
وہاب ریاض (سینئر ٹیم منیجر)، منصور رانا (ٹیم منیجر)، اظہر محمود (ہیڈ کوچ)، محمد یوسف (بیٹنگ کوچ)، سعید اجمل (اسپن بولنگ کوچ)، آفتاب خان (فیلڈ کوچ)، کلف ڈیکن (فزیو تھراپسٹ) ڈریکس سائمن (سٹرنتھ اینڈ کنڈیشنگ کوچ)، طلحہ بٹ (تجزیہ کار)، ارتضیٰ کومل (سیکیورٹی منیجر)، رضا کچلو (میڈیا اور ڈیجیٹل منیجر)، زین مقصود (ویڈیو گرافر)، ڈاکٹر خرم سرور (ڈاکٹر)، اور محمد عمران۔
