آئی سی سی مینز ٹی ٹوئنٹی ورلڈکپ کے سپر 8 مرحلے کے بعد سیمی فائنل میچز کا آغاز ہو چکا ہے۔ ایونٹ کا پہلا سیمی فائنل افغانستان اور جنوبی افریقا کے درمیان ٹرینیڈاڈ اینڈ ٹوباگو کے برائن لارا اسٹیڈیم میں ہوا، جس میں جنوبی افریقا نے فتح حاصل کر کے فائنل میں جگہ بنا لی ہے۔ اب دوسرا سیمی فائنل گیانا میں دفاعی چیمپئن انگلینڈ اور بھارت کے درمیان کھیلا جائے گا۔
ویسٹ انڈیز میں ان دنوں بارش کی پیش گوئی ہے اور خدشہ ہے کہ ٹی ٹوئنٹی ورلڈکپ کے دوسرے سیمی فائنل میں بھی بارش اپنا اثر دکھا سکتی ہے۔ اس حوالے سے آئی سی سی نے دونوں سیمی فائنلز کے لیے الگ الگ رولز بنائے ہیں۔
اگر بھارت اور انگلینڈ کے میچ میں بارش ہوئی تو اس سیمی فائنل کے لیے کوئی اضافی دن نہیں رکھا گیا ہے۔ اگر یہ میچ بارش کے باعث منسوخ ہو گیا تو بھارت بغیر کھیلے فائنل میں پہنچ جائے گا اور جنوبی افریقا کے مقابلے میں کھیلے گا۔
بھارت اور انگلینڈ کے سیمی فائنل میچ کے لیے ریزرو ڈے کے بجائے 250 منٹ کا اضافی وقت رکھا گیا ہے۔ البتہ، میچ منسوخ ہونے کی صورت میں بھارت سپر 8 مرحلے کے گروپ ون میں اپنی پہلی پوزیشن کی بنیاد پر فائنل میں پہنچ جائے گا۔ گروپ 1 میں بھارت نے مسلسل تین میچز میں کامیابی حاصل کر کے پہلی پوزیشن حاصل کی تھی، جبکہ انگلینڈ گروپ 2 میں 4 پوائنٹس کے ساتھ دوسرے نمبر پر تھا۔
پہلے سیمی فائنل کے لیے ریزرو ڈے اور دوسرے سیمی فائنل کے لیے ریزرو ڈے نہ ہونے کی بڑی وجہ دونوں میچوں کے اوقات ہیں۔ پہلا سیمی فائنل ڈے نائٹ میچ تھا جو 26 جون کو مقامی وقت کے مطابق رات ساڑھے 8 بجے شروع ہوا، جبکہ گیانا میں بھارت اور انگلینڈ کا سیمی فائنل ڈے میچ ہے جو 27 جون کو مقامی وقت کے مطابق صبح ساڑھے 10 بجے شروع ہوگا۔
28 جون کا دن فائنل میں پہنچنے والی دونوں ٹیموں کے سفر کے لیے مختص ہے جو 29 جون کو بارباڈوس میں کھیلا جائے گا۔ اس لیے 27 جون کو بھارت اور انگلینڈ کے درمیان ہونے والا میچ اسی دن مکمل کرنا پڑے گا اور اس لیے آئی سی سی نے اس سیمی فائنل کے لیے 250 منٹ کا اضافی وقت مختص کیا ہے۔
گیانا میں 27 جون کو صبح سے لے کر شام چار بجے تک بارش کی پیش گوئی کی گئی ہے۔ امید کی جا رہی ہے کہ آئی سی سی کی جانب سے اضافی وقت میں میچ مکمل ہو جائے گا۔ تاہم، اگر بارش کی وجہ سے میچ منسوخ ہو جاتا ہے تو سپر 8 مرحلے کی ٹاپ پوزیشن والی ٹیم فائنل کے لیے کوالیفائی کر لے گی اور جنوبی افریقا کا مقابلہ کرے گی۔
