پاکستانی ڈرامہ انڈسٹری کی بزرگ اور معروف اداکارہ عائشہ خان 76 برس کی عمر میں کراچی میں انتقال کر گئیں ہیں۔ پولیس ذرائع کے مطابق ان کی لاش کراچی کے علاقے گلشنِ اقبال میں واقع ان کے اپارٹمنٹ سے برآمد ہوئی ہے۔
رپورٹس کے مطابق وہ تنہا رہ رہی تھیں اور شبہ ظاہر کیا جا رہا ہے کہ ان کا انتقال چند روز قبل ہو چکا تھا۔ مختلف اطلاعات گردش کر رہی ہیں کچھ کا کہنا ہے کہ پڑوسیوں نے بدبو محسوس ہونے پر پولیس کو اطلاع دی جبکہ کچھ ذرائع کے مطابق کوئی مہمان جب ان سے ملنے آیا تو دروازہ نہ کھلنے پر پولیس کو بلایا گیا۔
پولیس کے مطابق پوسٹ مارٹم کا عمل ان کے بیٹے کے کراچی پہنچنے کے بعد کیا جائے گا۔
عائشہ خان 1948 میں پیدا ہوئیں اور انہوں نے افشاں، عروسہ، فیملی 93، شام سے پہلے اور بندھن جیسے کئی مشہور ڈراموں میں اداکاری کے جوہر دکھائے۔ ڈرامہ افشاں میں ان کے کردار کو بے حد سراہا گیا جس میں انہوں نے ایک ایسی عورت کا کردار ادا کیا تھا جو قیامِ پاکستان کے دوران پیچھے رہ جاتی ہے۔
ان کے انتقال کی خبر پر شوبز انڈسٹری کی نامور شخصیات جیسے خالد انعم اور عدنان صدیقی نے سوشل میڈیا پر افسوس کا اظہار کیا ہے۔ انہوں نے عائشہ خان کی اداکاری، شائستگی اور ان کے یادگار کیریئر کو خراجِ تحسین پیش کیا ہے اور ان کی مغفرت کی دعا کی ہے۔
یہ بھی پڑھیں : سابق گورنر سندھ کمال الدین اظفر کراچی میں انتقال کر گئ
