سندھ پولیس نے اعظم سواتی کے خلاف دائر کیس واپس لے لئے
سندھ پولیس نے بدھ کو پاکستان تحریک انصاف (پی ٹی آئی) کے سینیٹر اعظم سواتی کے خلاف سندھ کے لاڑکانہ، قمبر شہداد کوٹ اور کشمور اضلاع میں درج مقدمات واپس لے لئے ہیں۔
اعظم سواتی کے وکیل عبدالرؤف کورائی نے بتایا کہ پولیس کی جانب سے درج مقدمات کی کینسل رپورٹ جوڈیشل مجسٹریٹ اور سول جج نصیر آباد کی عدالت میں جمع کرائی گئی۔
انسپکٹر جنرل (آئی جی) سندھ کے حکم پر صوبے کے تین اضلاع میں پولیس نے مقدمات بند کر دئیے ہیں۔
اعظم سواتی کو دوبارہ اسلام آباد پولیس کے حوالے کیے جانے کا امکان
توقع ہے کہ جوڈیشل مجسٹریٹ اور سول جج جلد ہی پولیس رپورٹ پر اپنے احکامات جاری کریں گے اور اعظم سواتی کو دوبارہ اسلام آباد پولیس کے حوالے کیے جانے کا امکان ہے۔
یہ بھی پڑھیں | بلوچستان میں بلدیاتی انتخابات کے دوسرے مرحلے کے لیے پولنگ جاری
یہ بھی پڑھیں | کراچی کے بہترین سکولز کون سے ہیں؟
اعظم سواتی کو تین روزہ جسمانی ریمانڈ مکمل ہونے پر آج جوڈیشل مجسٹریٹ اور سول جج نصیر آباد کی عدالت میں پیش کیا جانا تھا۔
وفاقی تحقیقاتی ایجنسی
پی ٹی آئی رہنما کو وفاقی تحقیقاتی ایجنسی (ایف آئی اے) سائبر کرائم ونگ نے 27 نومبر کو سوشل میڈیا ویب سائٹ ٹوئٹر پر فوج کے خلاف توہین آمیز زبان استعمال کرنے پر گرفتار کیا تھا۔
اس کے بعد پی ٹی آئی رہنما کے خلاف بلوچستان اور سندھ میں مقدمات درج کیے گئے۔ تاہم بلوچستان ہائی کورٹ نے تمام مقدمات کو کالعدم قرار دے دیا تھا جبکہ سندھ پولیس نے انہیں گزشتہ ہفتے کوئٹہ سے اپنی تحویل میں لے لیا تھا۔
