امید کی جا رہی ہے کہ نیوزی لینڈ کے خلاف ٹی ٹوئنٹی سیریز کے لیے قومی کرکٹ اسکواڈ کا اعلان اگلے ایک دو روز میں ہو جائے گا۔
تفصیلات کے مطابق قومی کرکٹ اسکواڈ میں شامل ناموں کو حتمی شکل دینے کے لیے مشاورت کا آغاز ہو چکا ہے۔ یہ مشاورت کپتان بابر اعظم اور قومی سلیکٹرز کے درمیان ہو رہی ہے۔
اس حوالے سے کپتان اور سلیکٹرز نے چیئرمین محسن نقوی سے بھی تبادلہ خیال کیا تھا۔
ذرائع کے مطابق ہوم سیریز کی وجہ سے 18 کھلاڑیوں کے ناموں کا اعلان متوقع ہے۔
یاد رہے کہ فاسٹ بولر حارث رؤف ابھی تک مکمل فٹ نہیں ہوئے ہیں لیکن وہ ری ہیب جاری رکھیں گے۔
کن کن کھلاڑیوں کا نام زیرِ غور ہے؟
جن کھلاڑیوں کا نام زیر غور ہے ان میں کپتان بابر اعظم ، صائم ایوب، محمد رضوان، صاحبزادہ فرحان ، سلمان علی آغا ، افتخار احمد ، اعظم خان، شاداب خان ، اسامہ میر، شاہین آفریدی ، نسیم شاہ، عماد وسیم، محمد عامر شامل، زمان خان، عثمان خان ، وسیم جونیئر، عرفان نیازی اور عباس آفریدی شامل ہیں۔
یاد رہے کہ اس ماہ نیوزی لینڈ سے پاکستان کی سیریز کا آغاز 18 اپریل سے ہو گا۔
