مصباح الحق ہائی پروفائل کرکٹ ٹیکنیکل کمیٹی کی قیادت کریں گے
پاکستان کرکٹ بورڈ نے ایک ہائی پروفائل کرکٹ ٹیکنیکل کمیٹی (سی ٹی سی) تشکیل دی ہے جس میں پاکستان کے سابق کپتان مصباح الحق (سربراہ)، انضمام الحق اور محمد حفیظ شامل ہیں۔
سی ٹی سی کرکٹ سے متعلقہ معاملات پر سفارشات فراہم کرے گا،جس میں مجموعی ڈومیسٹک ڈھانچہ، شیڈولنگ، پلیئنگ کنڈیشنز، قومی سلیکشن کمیٹیوں کی تقرری، قومی ٹیم کے کوچز کی تقرری، سینٹرل اور ڈومیسٹک کنٹریکٹس اور ان کی ترقی کے منصوبے شامل ہیں۔
سی ٹی سی کے پاس اضافی کرکٹ ماہرین کو مدعو کرنے کے اختیارات ہوں گے اور وہ پی سی بی مینجمنٹ کمیٹی کے سربراہ کو مستقل بنیادوں پر رپورٹ کرے گا۔
یہ بھی پڑھیں | پی ٹی آئی رہنما افتخار درانی اسلام آباد سے گرفتار
چئیرمین ذکا اشرف کے تاثرات
پی سی بی مینجمنٹ کمیٹی کے چیئرپرسن ذکا اشرف نے کہا ہے کہ میں اپنے ملک میں کرکٹ کی بہتری کے لیے مصباح الحق، انضمام الحق اور محمد حفیظ کو بورڈ میں خوش آمدید کہتا ہوں۔ یہ تینوں سابق کپتان کرکٹ کے بارے میں زبردست علم رکھتے ہیں اور وہ جدید دور کی کرکٹ کے تقاضوں کو سمجھتے ہیں۔ کرکٹ کا ڈھانچہ کسی بھی کرکٹنگ قوم کا ستون ہوتا ہے۔ ہمیں اسے فول پروف اور اس کی ساخت کو ترقی پسند بنانا ہے۔ اس سے ہمیں اپنے کرکٹرز کو پھلنے پھولنے کا بہترین نظام فراہم کرنے میں مدد ملے گی تاکہ ہم بہترین کرکٹرز پیدا کر سکیں۔
مصباح الحق کے تاثرات
میرے لیے اس کمیٹی کا سربراہ مقرر ہونا بہت اعزاز کی بات ہے جس میں کئی عشروں تک پاکستان کرکٹ کی خدمت کرنے والے معزز افراد شامل ہیں۔ یہ ایک چیلنجنگ اسائنمنٹ ہے لیکن اس کمیٹی کے وسیع تجربے اور علم کے ساتھ، مجھے اس میں کوئی شک نہیں ہے کہ ہم ایسی سفارشات فراہم کر کے مثبت تبدیلی لانے کے قابل ہو جائیں گے جو نچلی سطح سے کھیل کی حالت کو بہتر بنا سکیں۔
